གཞན་ལ་སེམས་བཟང་བྱེད་དགོས།

གཞན་ལ་སེམས་བཟང་པོ་བྱེད་གལ་ཆེ།

སེམས་ཀྱི་ཞི་བདེ་མེད་པ་དང་བློ་ཡིད་མ་ཚིམས་པ་ཞེས་པ་ནི་རང་གཅེས་འཛིན་གྱི་ཀུན་སློང་ཧ་ཅང་ཤུགས་ཆེ་བའི་དབང་གིས་འབྱུང་གི་ཡོད་པ་རེད། གང་ཟག་སོ་སོར་སྔུག་བསྔལ་སྤོང་བ་དང་བདེ་བ་སྒྲུབ་པའི་ཐོབ་ཐང་ཡོད། འོན་ཀྱང་ང་ཚོས་སོ་སོ་རང་ཉིད་གཅིག་པུར་བསམ་བློ་གཏོང་བའི་ཚེ། སེམས་ཤིན་ཏུ་ངན་པར་འགྱུར་བ་ཡིན། དེས་ན། དཀའ་ངལ་ཆུང་ཆུང་ཞིག་ཆེན་པོར་སྣང་ནས་ང་ཚོ་བཏང་སྙོམས་སུ་མི་གནས་པར་འགྱུར། ང་ཚོས་སོ་སོ་རང་ཉིད་ལ་གཅེས་པ་བཞིན་དུ་གཞན་ལའང་དེ་བཞིན་གཅེས་པའི་སེམས་སྐྱེད་ཚེ། སེམས་གུ་ཡངས་པ་དང་རྒྱ་ཆེ་བ་ཡིན། དེའི་འབྲས་བུར་དཀའ་ངལ་ཛ་དྲག་པོ་ཞིག་ཀྱང་དེ་ཙམ་གྱི་གཙིགས་ཆེར་མི་སྣང་བ་ཡིན། བྱས་ཙང། ང་ཚོས་དངོས་པོ་ལ་ལྟ་བའི་ཚུལ་ཏེ། སོ་སོ་རང་ཉིད་ཀྱི་མཐོང་ཕྱོགས་སམ་ཚང་མའི་མཐོང་ཕྱོགས་ཀྱི་ཁྱབ་ཚད་ལ་བརྟེན་པའི་སེམས་ཚོར་ལ་ཁྱད་པར་ཆེན་པོ་ཞིག་ཡོད་པ་རེད།

དེ་འདྲ་སོང་བ་ཡིན་ཙང། སེམས་ཀྱི་ཞི་བདེར་གལ་ཆེ་བའི་ཆ་རྐྱེན་གཉིས་ཡོད་པ་རེད། དང་པོ་ནི། དངོས་ཡོད་གནས་ལུགས་ཤེས་རྟོགས་དགོས་པ་དེ་ཡིན། གལ་ཏེ་ང་ཚོས་དངོས་པོ་ལ་དངོས་པོའི་གནས་ཚུལ་དང་མཐུན་པའི་སྒོ་ནས་གདོང་ལེན་བྱེད་པ་ཡིན་ན། གློ་བུར་གྱི་མཇུག་འབྲས་མི་ཡོང་བ་ཡིན། གཉིས་པ་ནི། སྙིང་རྗེ་ཡིན་པ་དང་། དེ་ནི་ང་ཚོའི་ “ནང་གི་སྒོ་” ཟེར་བ་དེ་འབྱེད་ཀྱི་ཡོད་པ་དང་། གཞན་ལ་བརྟེན་ནས་བྱུང་བའི་ཞེད་སྣང་དང་དོགས་པ་རྣམ་རྟོག་མེད་པ་བཟོ་གི་ཡོད།

སེམས་བཟང་པོ་བྱེད་དགོས།

སེམས་བཟང་པོ་ཡོད་ན་མི་ཚེ་དོན་དང་ལྡན་པ་ཡོང་གི་རེད།

     ༧རྗེ་བླ་མ་བདག་ཉིད་ཆེན་པོས།  ནང་ཆོས་ཀྱི་སྙིང་པོ་ལྟ་བ་རྟེན་འབྱུང་དང་། སྤྱོད་པ་འཚེ་བ་མི་བྱེད་པ་གཉིས་ཡིན་ཞིང་། ལྟ་བ་རྟེན་འབྱུང་ནི་ཚན་རིག་དང་མཐུན་པ་ཆགས་ཡོད། སྤྱོད་པ་འཚེ་བ་མི་བྱེད་པ་དེ་ཡང་ལྷ་རབ་བྱུང་ན་གཞན་ལ་ཕན་བཏགས་དང་། མ་མཐའ་ལ་ཡང་ཕན་ཐོགས་བྱེད་མ་ཐུབ་ཀྱང་གནོད་པ་མི་བྱེད་དེ་ཡིན་ལ། དེ་ནི་ཁྱིན་ཚང་གི་ཞི་བདེ་དང་། སྤྱི་ཚོགས་ཀྱི་ཞི་བདེ་དང་། འཛམ་གླིང་གི་ཞི་བདེ་བཅས་དང་འབྲེལ་བ་ཡོད། འདི་དག་ལ་ང་ཚོས་སློབ་སྦྱོང་དང་བསམས་བཞིགས་བྱེད་ཏེ་ཤེས་པ་ཞིག་བྱེད་དགོས།། ༈ ཆོས་ངོ་མ་ནི་སེམས་ཀྱི་སྟེང་དུ་ཡོད་དགོས་པས་སེམས་དུལ་ན་ཆོས་ཡིན་དེ་མ་དུལ་ན་ཆོས་མིན། སེམས་དུལ་ན་ཁྱིམ་པ་ཕོ་མོ་གང་ཡང་མི་ཤེས་པ་ཞིག་ཡིན་ཀྱང་དེ་ནི་ཆོས་པ་རེད། སེམས་མ་དུལ་ན་བླ་མ་དང་དགེ་བཤེས་རྒྱལ་རིན་པོ་ཆེ་ཡིན་ནའང་ཆོས་པའི་གྲས་སུ་ཚུད་མེད། མིང་དང་གཏམ་ཐོབ་དང་གོ་ས་ཡོད་པས་མི་ཆོག  །སེམས་དུལ་མ་དུལ་གྱི་སྟེང་ནས་ཆོས་ཆོས་སུ་སོང་མ་སོང་འཇོག་དགོས། མི་ལ་རིན་ཐང་བྲལ་བའི་དངོས་པོ་ནི་སེམས་བཟང་པོ་དེ་ཡིན། སྨན་ཁང་ནས་སྨན་བཅོས་བྱས་ཏེ་སེམས་བཟང་པོ་བཟོ་རྒྱུ་མེད་ལ་ཁྲོམ་ནས་སེམས་བཟང་པོ་ཞིག་ཉོ་ཆ་རྒྱག་རྒྱུ་ཡང་མེད། དེ་ནི་སོ་སོས་བསམ་བློ་བཏང་ནས་སེམས་བཟང་པོ་བཟོ་དགོས་པ་ཡིན། སེམས་བཟང་པོ་ཡོད་ན་སོ་སོ་ལ་ཡང་ཕན་མི་གཞན་དག་ལ་ཡང་ཕན། མི་ཚེ་དོན་དང་ལྡན་པ་ཡོང་གི་རེད།།   ༈ རྒྱན་ཆ་ཟེར་བ་དེ་ནང་གི་རྒྱན་ཆ་དགོས་ཀྱི་རེད། ཆོས་ཡོན་ཏན་གྱི་ཤེས་ཚད་ཡོད་ན་རྒྱན་ཆ་རེད། སྒོ་གསུམ་ཞི་ཞིང་དུལ་བ་བྱེད་ན་དེ་རྒྱན་ཆ་རེད་མ་གཏོགས། ནང་ལ་ཆོས་དང་འཇིག་རྟེན་གྱི་ཡོན་ཏན་གང་ཡང་མེད་པར་སྐེད་པ་ལ་གྲི་འདྲ་བཏགས། གསེར་གྱི་ཚིགས་ཁེབས་འདྲ་ཞིག་རྒྱག  ཚིགས་ཁེབས་ལ་གཟི་འདྲ་བཞག་ནས་རི་ནང་བཞིན་བྱེད་འདུག  དེ་ཆོ་ཅིག་ཀྱང་མི་འདུག  དཔེ་ཞབས་འདྲེན་རེད། དེ་ནི་ངོ་ཚ་ཡ་རེད། བོད་ལ་བཞུགས་མཁན་ཚོ་ལ་ལེན་སྐྱེལ་ཤོག་ཨ། ཁྱོད་ཚོས་རྒྱན་ཆ་དེ་འདྲ་བྱེད་ཡོང་དུས་རྒྱལ་བ་རིན་པོ་ཆེ་ངོ་ཚ་ནས་སྡོད་འདུག་ལབ་ཤོག་ཨ།།    ༈ ང་ཚོས་རང་ཉིད་བདེ་སྐྱིད་ཡོང་བའི་ཆེད་དུ་གཞན་ལ་སྡུག་བསྔལ་བཟོ་གི་ཡོད། ཡིན་ནའང་བདེ་སྐྱིད་ངོ་མ་ནི་ནང་སེམས་ཀྱི་ཞི་བདེ་དང་འདོད་ཆུང་ཆོག་ཤེས་བྱས་པ་ལས་བྱུང་བ་ཞིག་ཡིན་པས་ང་ཚོས་ངེས་པར་དུ་གཞན་ཕན་སྙིང་རྗེ་དང་བརྩེ་སེམས། གཞན་དོན་ལྷུར་ལེན་གྱི་ཕྱོགས་ལ་བློ་སྦྱངས་བྱས་ཏེ་ཁོང་ཁྲོ་དང་གཅེས་འཛིན་འདོད་རྔམ་གྱི་བསམ་བློ་དེ་ཚོ་རྩ་མེད་བཟོ་དགོས་ཅེས་གསུངས་སོ། ། 

ཡེ་ཤེས་ཀྱི་མཁའ་འགྲོ་མ་སེང་གེའི་གདོང་པ་ཅན་གྱི་བཟློག་པ།

 ༄༅། །ཡེ་ཤེས་མཁའ་འགྲོ་མ་སེངྒེའི་གདོང་ཅན་གྱི་ཟློག་པ་བཞུགས་སོ།།

༈ སངས་རྒྱས་ཆོས་དང་ཚོགས་ཀྱི་ཆོས་རྣམས་ལ།། བྱང་ཆུབ་བར་དུ་བདག་ནི་སྐྱབས་སུ་མཆི།། བདག་གིས་སྦྱིན་སོགས་བགྱིས་པའི་ཚོགས་རྣམས་ཀྱིས།། འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ། ཨོཾ་སྭ་བྷཱ་ཝ་ཤུདྡྷ༔སྭརྦ་དྷརྨཱ༔སྭ་བྷཱཝ་ཤུདྡྷོཉཧཾ། ཆོས་ཐམས་ཅད་རང་བཞིན་གྱིས་གྲུབ་པས་སྟོང་པའི་སྟོང་པ་ཉིད་དུ་གྱུར། སྟོང་པའི་ངང་ལས་སྣ་ཚོགས་པདྨ་དང་ཉི་མ་དང༌། རོའི་གདན་ལ་རང་ཉིད་ཡེ་ཤེས་ཀྱི་མཁའ་འགྲོ་མ་སེངྒེའི་གདོང་པ་ཅན། གཡས་སུ་ཡེ་ཤེས་ཀྱི་མཁའ་འགྲོ་མ་སྟག་གི་གདོང་པ་ཅན། གཡོན་དུ་ཡེ་ཤེས་ཀྱི་མཁའ་འགྲོ་མ་དོམ་གྱི་གདོང་པ་ཅན། གསུམ་ཀའང་མགྲིན་པ་མན་ཆད་སྐུ་མདོག་སྔོན་པོ། ཞལ་གཅིག་ཕྱག་གཉིས། ཕྱག་གཡས་ཉི་མའི་དཀྱིལ་འཁོར། གཡོན་ཟླ་བའི་དཀྱིལ་འཁོར། ཞབས་གཡས་བསྐུམ་ཞིང་གཡོན་བརྐྱང་བའི་གར་སྟབས་ཀྱིས་ཡེ་ཤེས་ཀྱི་མེ་རབ་ཏུ་འབར་བའི་དབུས་ན་བཞུགས་པ། དེའི་སྤྱི་བོར་ཨོཾ། མགྲིན་པར་ཨཱ༔ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས་པས། མཁའ་སྤྱོད་ཀྱི་གནས་ནས་ཡེ་ཤེས་ཀྱི་མཁའ་འགྲོ་མ་སེང་གེའི་གདོང་པ་ཅན་ལ་སོགས་པ་མཁའ་འགྲོ་མ་བྱེ་བ་འབུམ་གྱི་ཚོགས་དང་བཅས་པ། གཞན་ཡང་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་བ་མདུན་གྱི་ནམ་མཁར་སྤྱན་དྲངས། བཛྲ་ས་མ་ཡ་ཛ༔ཛ༔ དུས་གསུམ་རྒྱལ་བ་མ་ལུས་བསྐྱེད་མཛད་མ།། དམ་ཉམས་དགྲ་བགེགས་ཐལ་བར་རློག་མཛད་མ།། ཡེ་ཤེས་མཁའ་འགྲོ་སེང་གེའི་གདོང་པ་ཅན།། བསྟན་སྲུང་ཆེན་མོ་འཁོར་བཅས་གཤེགས་སུ་གསོལ།། ལན་གསུམ་བརྗོད། སྤྱན་དྲངས་པའི་ལྷ་ཚོགས་དེ་རྣམས་ཀྱིས་བདག་ཉིད་ལ་མགོན་སྐྱབས་དང་དཔུང་གཉེན་གྱི་ཚུལ་དུ་བཞུགས་པར་གྱུར། རང་གི་ཐུགས་ཀའི་ཉི་མའི་དཀྱིལ་འཁོར་གྱི་སྟེང་དུ་ཧཱུཾ་ཡིག་གི་མཐར་བཟླས་བྱའི་སྔགས་ཀྱིས་གཡས་སྐོར་དུ་བསྐོར་བར་གྱུར། 

ཨ༔ཀ༔ས༔མ༔ར༔ཙ༔ཤ༔ད༔ར༔ས༔མ༔ར༔ཡ༔ཕཊ།  ན་མོ་བླ་མ་ཡང་དག་པའི་ཡོངས་འཛིན་དགེ་བའི་བཤེས་གཉེན་རྣམས་ཀྱི་བདེན་པ་དང༌། ཡི་དམ་དཀྱིལ་འཁོར་གྱི་ལྷ་ཚོགས་འཁོར་དང་བཅས་པ་རྣམས་ཀྱི་བདེན་པ་དང༌། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་བདེན་པ་དང༌། དཔལ་མགོན་དམ་པ་ཆོས་སྐྱོང་བའི་སྲུང་མ་ཡེ་ཤེས་ཀྱི་སྤྱན་དང་ལྡན་པ་རྣམས་ཀྱི་བདེན་པ་དང༌། ཁྱད་པར་དུ་ཡང་ཡེ་ཤེས་ཀྱི་མཁའ་འགྲོ་མ་སེང་གེའི་གདོང་པ་ཅན་ལ་སོགས་པའི་མཁའ་འགྲོ་མ་བྱེ་བ་འབུམ་གྱི་ཚོགས་དང་བཅས་པ་རྣམས་ཀྱི་བདེན་པ་དང༌། བདེན་པ་ཆེན་པོས་བྱིན་གྱིས་བརླབས་པ་ལ་བརྟེན་ནས། རྣལ་འབྱོར་པ་བདག་ཅག་དཔོན་སློབ་འཁོར་དང་བཅས་ཐམས་ཅད་ལ་སྡང་བའི་སེམས་དང་ལྡན་པ། གདུག་པའི་སེམས་དང་ལྡན་པ། བསམ་པ་ངན་པ། སྦྱོར་བ་རྩུབ་པ་ཐམས་ཅད་ཕྱིར་བཟློག་ཅིང་ཐལ་བའི་རྡུལ་ཕྲན་བཞིན་དུ་བརླག་པའི་འཕྲིན་ལས་མཛོད་ཅིག །མཁའ་འགྲོ་བྱེ་བའི་ཚོགས་རྣམས་ཀྱིས།། དགྲ་བགེགས་བྱད་མ་ཐམས་ཅད་ཀྱི།། ལུས་ངག་ཐལ་བའི་རྡུལ་དུ་རློགས།། རྣམ་ཤེས་ཆོས་ཀྱི་དབྱིངས་སུ་སྒྲོལ།། མཁའ་ལ་སྤྱོད་པའི་གནས་མཆོག་དམ་པ་ན།། མངོན་ཤེས་རྫུ་འཕྲུལ་མངའ་བའི་མཐུ་སྟོབས་ཅན།། སྒྲུབ་པ་པོ་ལ་མ་གཡེལ་བུ་བཞིན་གཟིགས།། གནས་གསུམ་མཁའ་འགྲོའི་གཙོ་ལ་ཕྱག་འཚལ་ལོ།། གང་གི་སྒོ་ནས་མི་བསྲུན་སྐྱེ་བོ་ཡི།། བདག་ཅག་བདེ་ལེགས་འཕྲོག་པའི་རིགས་སྔགས་སོགས།། མ་ལུས་བཟློག་ཅིང་གཞན་དུ་བསྒྱུར་བ་ཡིས།། བཤད་སྒྲུབ་བསྟན་པ་རྒྱས་པའི་འཕྲིན་ལས་མཛོད།། དགེ་བ་འདི་ཡིས་མྱུར་དུ་བདག །ཡེ་ཤེས་མཁའ་འགྲོ་འགྲུབ་གྱུར་ནས།། འགྲོ་བ་གཅིག་ཀྱང་མ་ལུས་པ།། དེ་ཡི་ས་ལ་འགོད་པར་ཤོག །གནས་འདིར་བྱིན་རླབས་དཔལ་འབྱོར་མི་ཉམས་ཞིང༌། བསམ་སྦྱོར་ངན་པའི་གདུག་རྩུབ་ཞི་བ་དང༌།། ཚུལ་ཁྲིམས་རྣམ་པར་དག་པའི་ཁུར་འཛིན་པའི།། དགེ་འདུན་ཚོགས་ཀྱིས་གང་བའི་བཀྲ་ཤིས་ཤོག ། །།

གདུགས་དཀར་བསྟོད་པ།

༄༅། །གདུག་དཀར་བསྟོད་པ་དང་དེའི་ལྡོག་པ་བཞུགས་སོ།།

༈ རྒྱལ་བ་བྱེ་བ་བདུན་དང་འཕགས་པའི་འཁོར།། དྲང་སྲོང་རིགས་སྔགས་འཆང་དང་ཚངས་དབང་དང༌།། ལེགས་ལྡན་ནག་པོ་གདུང་བདུན་བདེ་གཤེགས་བཅུ།། ཕྱག་འོས་རྣམས་ལ་གུས་པས་ཕྱག་བྱས་ནས།། བདེ་གཤེགས་གཙུག་ནས་གསང་སྔགས་ཚིག་ཕྱུང་སྟེ།། གང་གིས་བསྔགས་པ་འཁོར་ལ་བཀའ་བསྩལ་བའི།། དཔལ་ལྡན་གདུགས་དཀར་ཅན་ལ་བསྟོད་པར་བྱ།། འཆི་མེད་དབང་པོའི་མདུན་ས་ཆོས་བཟང་དུ།། ཤཱཀྱའི་རྒྱལ་པོའི་མཚན་མཆོག་གཙུག་ཏོར་ནས།། ལེགས་འཁྲུངས་བདུད་ཀྱི་རིགས་ཀྱིས་མི་ཐུབ་ཅིང༌།། ཕས་ཀྱི་རྒོལ་བ་ཐམས་ཅད་ཕྱིར་ཟློག་པས།། གཞན་གྱིས་མི་ཐུབ་གཙུག་ཏོར་གདུགས་དཀར་ཞེས།། ཡོངས་སུ་གྲགས་པས་ས་གསུམ་ཀུན་ཁྱབ་པ།། དུས་གསུམ་རྒྱལ་བ་ཀུན་གྱི་ཡུམ་གཅིག་པུ།། བཅོམ་ལྡན་འདས་མ་ཁྱོད་ལ་བདག་ཕྱག་འཚལ།། གདོན་དང་རྒྱུ་སྐར་གཟའ་ཡི་གནོད་པ་དང༌།། དུས་མིན་འཆི་དང་སྡིག་པའི་རྨི་ལམ་དང༌།། དུག་མཚོན་མེ་དང་ཆུ་ཡི་གནོད་པ་སོགས།། མ་ལུས་ཞི་མཛད་ཁྱོད་ལ་ཕྱག་འཚལ་ལོ།། སྐུ་ཡི་དཀྱིལ་འཁོར་ཁྱོན་ནི་ཤིན་ཏུ་ཡངས།། དུ་མའི་ཉམས་ཅན་དབུ་ནི་སྟོང་ཕྲག་དང༌།། འབར་བའི་ཕྱག་མཚན་ལྡན་པའི་ཕྱག་སྟོང་ཅན།། ས་གསུམ་དཀྱིལ་འཁོར་ཀུན་ལ་དབང་མཛད་མ།། དྲག་ཤུལ་ཆེ་སོགས་ཉེར་གཉིས་ཕྱག་རྒྱའི་འཁོར།། གདུག་པ་འདུལ་བའི་ལས་ལ་ཐོགས་མེད་པས།། ནག་པོའི་སྡེ་རྣམས་རྡུལ་དུ་བརླག་མཛད་པའི།། རིག་སྔགས་ལྷ་མོའི་ཚོགས་ལ་ཕྱག་འཚལ་ལོ།། དུས་མིན་འཆི་དང་ནད་ཀྱི་འཇིགས་པ་སོགས།། མི་དང་མི་མིན་འབྱུང་པོས་བསྐྱེད་པ་ཡི།། འཇིགས་པ་དྲན་ནས་ཁྱོད་ལ་སྐྱབས་འཆའ་ན།། འཇིགས་པ་ཀུན་ལས་རྟག་ཏུ་སྲུང་དུ་གསོལ།། ལྷ་ཀླུ་ལྷ་མ་ཡིན་ལ་སོགས་པ་ཡི།། གདོན་ཆེན་རྣམས་དང་གཟི་བརྗིད་མདངས་འཕྲོག་ཅིང༌།། མངལ་དང་ཤ་ཁྲག་ལ་སོགས་ཟ་བ་ཀུན།། ཁྱོད་ཞབས་དྲན་པ་ཙམ་གྱིས་བཟློག་ཏུ་གསོལ།། གང་གི་སྒོ་ནས་མི་བསྲུན་སྐྱེ་བོ་ཡི།། བདག་ཅག་བདེ་ལེགས་འཕྲོག་པའི་རིགས་སྔགས་སོགས།། མ་ལུས་བཅད་དང་འབར་བའི་ཕུར་བ་ཡི།། དེ་དག་རྣམས་ལ་གདབ་པའི་འཕྲིན་ལས་མཛོད།། མདོར་ན་བཅོམ་ལྡན་མ་ཁྱོད་ཕྱག་རྒྱའི་འཁོར།། སྐྱབས་སུ་བཟུང་ནས་རེ་བ་འཆའ་བ་ཡི།། ཚུལ་འདི་དགོངས་ལ་འགལ་རྐྱེན་ཀུན་ཞི་ཞིང༌།། མཐུན་རྐྱེན་མ་ལུས་ཡིད་བཞིན་འགྲུབ་པར་མཛོད།། བདེ་བཤེགས་གཙུག་ནས་གདུགས་དཀར་ལྷ་མོ་ཞེས།། གདོན་དང་བགེགས་རིགས་འབྱུང་པོའི་ཚོགས་བཅས་ཀུན།། ཕྱེ་མར་འཐག་བྱེད་རྔམས་པའི་གཟི་བརྗིད་ཅན།། བཅོམ་ལྡན་མ་ཁྱོད་ཐུབ་བསྟན་རྒྱས་པར་མཛོད།། བདེ་གཤེགས་ཐུགས་རྗེའི་གཙུག་ཏོར་ལས་འཁྲུངས་ཤིང༌།། བདེ་འབྱུང་བསྟན་ལ་གནོད་བྱེད་ཚར་བཅད་ནས།། བདེ་ལེགས་འབྲས་བུ་ཉེར་བར་སྩོལ་མཛད་པའི།། བདེ་མཆོག་གདུགས་དཀར་ཅན་གྱི་བཀྲ་ཤིས་ཤོག །ཅེས་པའང་བྱའོ། གཙུག་གཏོར་གདུགས་དཀར་ཅན་ལ་བསྟོད་པ་འདི་ནི། ༧བློ་བཟང་གྲགས་པའི་དཔལ་གྱི་སྡོམ་བརྩོན་ཤེས་རབ་རྒྱལ་མཚན་ལ་སོགས་པས་བསྐུལ་བའི་ངོར་སྦྱར་བའོ།། 

༈ བདེ་གཤེགས་གཙུག་ཏོར་ལྟར་མི་མངོན་པ་ལས།། ཉེར་འཁྲུངས་རྒྱལ་བ་ཀུན་ཡུམ་གདུགས་དཀར་མོ།། མཚན་ཙམ་བོས་པའི་རིགས་སྔགས་མེ་ཡིས་ཀྱང༌།། བདུད་སྡེ་སྲེག་བྱེད་བདེ་འབྱུང་ལྷག་པའི་ལྷ།། དཀར་གསལ་ལང་ཚོ་རབ་རྫོགས་ཟླ་གཞོན་གྱི།། སྙིང་པོ་ལས་གྲུབ་གཞན་གྱིས་མི་ཐུབ་མས།། མི་དང་མི་མིན་འབྱུང་ལས་བྱུང་བ་ཡི།། འགལ་རྐྱེན་ཀུན་ཞི་ལེགས་ཚོགས་མ་ལུས་སྩོལ།། ཁྱད་པར་ཕ་རོལ་མི་བསྲུན་བསམ་སྦྱོར་གྱིས།། སྒོ་གསུམ་མནན་དང་བྱད་སྟེམས་བཅིངས་ལ་སོགས།། ཉེར་འཚེས་མི་ཚུགས་ཕྱིར་ཟློག་འཕྲིན་ལས་ཀྱིས།། བདག་ཅག་རྣམ་པ་ཀུན་ཏུ་སྲུང་དུ་གསོལ།། ཞེས་པ་འདི་ནི་ཕ་རོལ་གྱི་སྐྱེ་བོ་མི་བསྲུན་པས་རིགས་སྔགས་ངན་པའི་སྦྱོར་བས་བྱད་མནན་སོགས་གཙོ་གྱུར་གྱི་ཉེར་འཚེའི་མཚན་མ་ཞི་བའི་འདོད་གསོལ་གདུགས་བསྟོད་སོགས་ཀྱི་གཤམ་དུ་ཁ་ཏོན་བྱེད་རྒྱུར་ཤཱཀྱའི་དགེ་སློང་བློ་བཟང་བསྐལ་བཟང་རྒྱ་མཚོས་སྦྱར་བའོ།། 

༈ བཅོམ་ལྡན་གདུགས་དཀར་ལྷ་ཚོགས་རྣམས།། མཐུ་སྟོབས་ཐོགས་པ་མི་མངའ་ཞིང༌།། ཐུགས་རྗེའི་སྨོན་ལམ་མཐུ་བཙན་པས།། བདག་གིས་གསོལ་བ་བཏབ་པ་བཞིན།། སངས་རྒྱས་བསྟན་པ་དར་བ་དང༌།། སེམས་ཅན་ཐམས་ཅད་བདེ་གྱུར་ཅིག །རྒྱུ་སྦྱོར་ཡོན་བདག་འཁོར་བཅས་ཀྱི།། ཆགས་ཆེ་ཉམ་ང་ཟློག་ཏུ་གསོལ།། རྨི་ལམ་མཚན་མ་ངན་པ་ཟློག །དགྲ་འདྲེའི་བསམ་སྦྱོར་ངན་པ་ཟློག །ལྟས་ངན་བརྒྱད་ཅུ་རྩ་བཞི་ཟློག །ཡེ་འབྲོག་སུམ་བརྒྱ་དྲུག་ཅུ་ཟློག །ནད་རིགས་བཞི་བརྒྱ་རྩ་བཞི་ཟློག །བགེགས་རིགས་སྟོང་ཕྲག་བརྒྱད་ཅུ་ཟློག །དུས་མིན་འཆི་བ་རྣམ་བརྒྱད་ཟློག །ཡས་ཀྱི་བདུད་དུ་གཡོས་པ་ཟློག །མས་ཀྱི་སྲི་རུ་ལངས་པ་ཟློག །དཔྲལ་བ་གཤེད་དུ་བརྐོས་པ་ཟློག །ཕ་མེས་དུར་སྲི་ལངས་པ་ཟློག །མི་ལ་ནད་དུ་གཏོང་བ་ཟློག །ཕྱུགས་ལ་གོད་ཁ་བྱེད་པ་ཟློག །གནམ་གྱི་དལ་ཁ་ཐེབས་པ་ཟློག །ས་ཡི་དུག་མདའ་གཡོས་པ་ཟློག །སྨེ་བ་སྤར་ཁ་ངན་པ་ཟློག །སྐེག་དང་ཕུང་སྲི་ལངས་པ་ཟློག་ཏུ་གསོལ།། ཞེས་པ་གཙུག་ཏོར་གདུགས་དཀར་ལ་བརྟེན་པའི་ཟློག་པ་གྲུབ་ཆེན་ལས་ཀྱི་རྡོ་རྗེས་མཛད་པའོ།། །། 

དཔལ་ཆེན་རྟ་མགྲིན་པདྨ་ཡང་གསང་གི་ཉམས་ལེན་རྒྱུན་འཁྱེར།

༄༅། །དཔལ་ཆེན་རྟ་མགྲིན་པདྨ་ཡང་གསང་གི་ཉམས་ལེན་རྒྱུན་འཁྱེར་བཞུགས་སོ།།

 

༈ ཆོས་དབྱིངས་ངང་ལས་ཁྲག་ཞག་འཁྱིལ་བའི་དབུས།། པད་ཉི་བམ་རོ་བརྩེགས་པའི་གདན་སྟེང་དུ།། ཧྲཱི༔ལས་བྱུང་བའི་དབང་ཆེན་རྟ་མཆོག་དཔལ།། ཞལ་གསུམ་ཕྱག་དྲུག་ཞབས་བཞི་སྲིན་པོའི་གཟུགས།། དམར་ནག་གཡས་དཀར་གཡོན་ལྗང་ཁྲོས་པའི་སྐུ།། ཞལ་གདངས་མཆེ་བ་གཙིགས་ཤིང་ལྗགས་དམར་གཡོ།། སྤྱན་གསུམ་མེ་ལྟར་འབར་བའི་ཁྲོ་གཉེར་བསྡུས།། ཁམས་སེར་རལ་པའི་ཁྲོད་ན་རྟ་མགོ་མཛེས།། བསྐམ་རློན་ཐོད་པ་སྦྲུལ་གདུག་རྒྱན་གྱིས་བརྒྱན།། ཕྱག་དྲུག་དང་པོ་པདྨ་བྷན་དྷ་ཡིས།། མཛེས་ཤིང་ཡུམ་མཆོག་གར་དབང་མ་ལ་འཁྱུད།། བར་མ་གཉིས་ཀྱིས་ལྕགས་ཀྱུ་ཞགས་པ་དང༌།། ཐ་མས་བེ་ཅོན་རལ་གྲི་འབར་བ་བསྣམས།། གླང་ཆེན་ཀོ་རློན་སྟག་པགས་ཤམ་ཐབས་ཅན།། ཞབས་བཞི་གཡས་བསྐུམ་གཡོན་བརྐྱངས་ཚུལ་གྱིས་བཞུགས།། གསང་ཡུམ་མཐིང་ནག་ཚལ་གཅིག་ཕྱག་གཉིས་ཀྱིས།། ཙིཏྟ་ཐོད་ཁྲག་འཛིན་པས་ཡབ་ལ་འཁྱུད།། སྙོམས་པར་འཇུག་པས་མེ་དཔུང་འབར་བའི་དབུས།། བཞུགས་པའི་གནས་གསུམ་ཡི་གེའི་འོད་ཟེར་གྱིས།། ཡེ་ཤེས་སྤྱན་དྲངས་དབྱེར་མེད་བརྟན་པར་བཞུགས།། དངོས་གྲུབ་ཀུན་སྩོལ་བར་ཆད་ཀུན་སེལ་བའི།། པདྨ་དབང་གི་ལྷ་ལ་ཕྱག་འཚལ་ལོ།། མཆོད་ཚོགས་ཀུན་འབུལ་སྡིག་ལྟུང་སོ་སོར་བཤགས།། དགེ་ལ་ཡི་རང་ཆོས་འཁོར་བསྐོར་བ་དང༌།། སྲིད་མཐར་བཞུགས་གསོལ་དགེ་ཚོགས་ཐམས་ཅད་བསྔོ།། དབང་ཆེན་ཐུགས་ཀའི་སྔགས་ཕྲེང་འབར་བ་ཡི།། འོད་ཟེར་སྤྲོ་བསྡུ་དོན་གཉིས་སྒྲུབ་བྱེད་པ།། ཏིང་འཛིན་མི་གཡེལ་རྩེ་གཅིག་བཟླས་བརྗོད་བྱ།། 

   ཧྲཱི༔བཛྲ་ཀྲོ་དྷ་ཧཱ་ཡ་གྲཱི་ཝ་ཧ་ལུ་ཧུ་ལུ་ཧཱུཾ་ཕཊ།། ལན་གང་མང་བཟླ། དེ་ལྟར་བསྒྲུབས་པའི་དགེ་ཚོགས་ཟླ་ཟེར་ལྟར།། མཆོག་ཏུ་དཀར་བ་ཇི་སྙེད་བསགས་པ་དེས།། ཁྲོ་རྒྱལ་ཡང་གསང་ཁྲོས་པའི་སྐུར་གྱུར་ནས།། འགྲོ་ཀུན་དེ་ཡི་ས་ལ་འགོད་པར་ཤོག ། ཅེས་པ་འདི་ནི་པཎ་ཆེན་བློ་བཟང་ཆོས་རྒྱན་གྱིས་མཛད་པའོ།། །། 

  ༈ ཧྲཱི༔ ཡིག་ལས་སྐྱེས་བཛྲ་ཀྲོ་དྷ་ཞེས།། ཧ་ཡ་གྲཱི་ཝ་བགེགས་ལ་རྔམས་པའི་ཞལ།། ཧུ་ལུ་ཧུ་ལུ་ཧཱུྃ་དང་ཕཊ་ཀྱི་སྒྲ། ཁམས་གསུམ་དབང་དུ་སྡུད་ལ་ཕྱག་འཚལ་ལོ།། ཧྲཱི༔བཛྲ་ཀྲོ་དྷ་ཧཱ་ཡ་གྲཱི་ཝ་ཧ་ལུ་ཧུ་ལུ་ཧཱུཾ་ཕཊ།། དགེ་བ་འདི་ཡིས་བདག་སོགས་སེམས་ཅན་རྣམས།། པདྨ་རྒྱལ་པོའི་གོ་འཕང་མཆོག་ཐོབ་ནས།། མ་རིག་ལྡོངས་པའི་སྐྱེ་ཚོགས་ཐམས་ཅད་ལ།། རོལ་པའི་རྟ་སྐད་ཕྱོགས་བཅུར་སྒྲོགས་པར་ཤོག །།

ལབ་མ་ཎི་བུམ་སྒྲུབ་ཆེན་མོ།

༄། །མྱི་ལོ་བརྒྱ་ཕྲག་དུ་མིའི་རིང་མི་ཉམས་རྒྱུན་འཛིན་ལོ་རྒྱུས་རང་བཞིན་ལྡན་པའི་ལབ་དགའ་ལྡན་མདོ་སྔགས་བཤད་སྒྲུབ་ཆོས་འབྱོར་རབ་རྒྱས་ལབ་གླིང་གི་མ་ཎི་བུམ་སྒྲུབ་ཆེན་མོ་སྤྱི་ལོ 2014 ལོ་ཟླ 12 ཚེས 29 ཉིན་འགོ་འཛུགས་ཀྱིས་ཉིན་མཚན་བཅུ་བཞིའི་རིང་མ་ཎི་བསགས་སྒྲུབ་གནང་རྒྱུ་དང་དེའི་སྐབས་གཏོར་མ་དང་མཆོད་བཤམས་གྱི་འདྲ་དཔར་ཁག་ཅིག་ཡིན། 🙏🙏🙏🙏🙏🙏🙏🙏🙏🙏🙏🙏

Dedication Prayers

༄༅། །གངས་རི་རྭ་བས་བསྐོར་བའི་ཞིང་ཁམས་སུ།། 於此雪嶺所繞國土中 ཕན་དང་བདེ་བ་མ་ལུས་འབྱུང་བའི་གནས།། 一切利益安樂之生處 སྤྱན་རས་གཟིགས་དབང་བསྟན་འཛིན་རྒྱ་མཚོ་ཡིས།། 津玾措觀自在菩薩 ཞབས་པད་སྲིད་མཐའི་བར་དུ་བརྟན་གྱུར་ཅིག ། 願其常住直至生死盡 ༄༅།། སྡིག་པ་ཅི་ཡང་མི་བྱ་ཞིང༌།། 任何最惡皆不作 དགེ་བ་ཕུན་སུམ་ཚོགས་པར་སྤྱད།། 圓滿善業盡奉行 རང་གི་སེམས་ནི་ཡོངས་སུ་འདུལ།། 自心己意遍調伏 འདི་ནི་སངས་རྒྱས་བསྟན་པ་ཡིན།། 此乃佛陀之教法 ༄༅།།ས་སོགས་འབྱུང་བ་ཆེན་པོ་དང༌།། 願如地等四大種， ནམ་མཁའ་བཞིན་དུ་རྟག་པར་ཡང༌།། 亦如虛空常無盡 སེམས་ཅན་དཔག་ཏུ་མེད་པ་ཡི།། 有情種類多無量， རྣམ་མང་ཉེར་འཚོའི་གཞིར་ཡང་ཤོག ། 悉能為彼俱 ༄༅། །སེམས་ཅན་འདི་དག་ཐམས་ཅད་ནི།། 願彼一切諸有情 ཚེ་ཡང་དཔག་མེད་རིང་བར་ཤོག ། 壽量綿長終無盡 རྟག་ཏུ་བདེ་བར་འཚོ་འགྱུར་ཞིང༌།། 恆常享受諸安樂 འཆི་བའི་སྒྲ་ཡང་གྲགས་མ་གྱུར།། 死字言聲亦不聞